早排前特首梁振英係咁借陳浩天去FCC演講挑起港獨議題四圍打人，又去信告鍾劍華、立場新聞誹謗，成班極左派亦配合689炒熱港獨，究竟689咁做為乜？政圈眾說紛紜，有人話係為外界追擊UGL事件轉移視線，而自由黨榮譽主席田北俊覺得689搞咁多嘢，除咗為UGL事件，仲要做畀北京睇，佢比特首林鄭月娥更政治正確。

團體赴英咬實UGL事件

田少噚日去劉慧卿網台節目，被問到點睇689近日頻頻向評論UGL事件人士發律師信，田少話如果689真係覺得自己喺UGL事件入面完全冇問題，「就唔需要咁擔心咁多人問嘢、咁多人去查佢啲嘢！」至於689不斷喺fb撰文鬧港獨，田少相信689只係想做畀北京睇，自己比林鄭更加政治正確，但田少又話，若非689惹火言論，根本唔會咁多人去聽陳浩天港獨演講，一直想打港獨嘅中央同特區政府，今次真係多得689唔少。
講開UGL事件，689梗係唔想有人再講，但去到外國，就算689係政協副主席，人哋點會理你指指點點，林卓廷同八方講，佢同尹兆堅又會去英國跟進調查UGL事件，除咗見佢哋委聘嘅律師，仲會見國會議員、國際反貪組織、同一啲當地傳媒，望外國多啲關注UGL事件，全力調查令真相水落石出。

李八方