煲呔近日開心到暈，事關佢嘅愛將上位有望，呢鋪仲唔可以拍住上玩鋪勁？上星期二晚煲呔罕有喺禮賓府宴請工聯會，成場笑口噬噬，就算對住成日鬧佢嘅鄺志堅都係咁嘅樣，仲主動撩佢傾偈，鄺大狀都話煲呔變咗，變得平心靜氣兼Sociable喎。
鄺大狀好耐以前鬧過煲呔唔應該豪花30萬為錦鯉起個安樂窩，搞到煲呔㷫㷫哋。既然一場嚟到，煲呔都有請佢哋去睇錦鯉，第一次光臨錦鯉池嘅鄺大狀睇完覺得不外如是，30萬咁裝修法嘥啲喎，煲呔就當然唔提呢啲敏感嘢，反而係咁猛講啲錦鯉養咗好耐，最老嗰條計落有成50幾歲，真係要好好愛護。