【新增內容】
韓國男團EXO嘅27歲前中國成員鹿晗，現時喺大陸發展，早前佢忙於拍攝劇集《甜蜜暴擊》，當中女主角就係20歲大陸女星關曉彤。

不過今日中午，鹿晗忽然喺微博留言：「大家好，給大家介紹一下，這是我女朋友@關曉彤。」疑似公開戀情，而同時間關曉彤亦好合拍地更新微博，並留言：「哎呀嘛，哢哢的！」並tag咗鹿晗兼畀咗個心心圖案對方。而事實上鹿晗曾公開講過，如果有女友佢一定會公開，所以今次佢就兌現承諾，公開認戀關曉彤。

消息一出後，即時令兩人名字登上微博搜尋榜嘅冠軍，唔少鹿晗嘅粉絲都大感晴天霹靂，並留言表示唔相信，又質疑鹿晗個賬號被盜用，不過有網民就覺得鹿晗身為偶像派，唔會咁樣高調公開戀情，估計二人係想為劇集宣傳。

另外，喺二人公開戀情後，網上就流出二人嘅親密合照，當中關曉彤親密地依偎喺鹿晗膊頭。