亞視重新開台僅95日，今日突然再傳出大地震，亞視CEO吳雨、營運總監區偉林嚟緊將轉做顧問，而製作總監林嘉穎舊年以私人理由遞信辭職。

《蘋果》收到消息稱，今次「大地震」是因為亞視老闆「唔再泵水」，另據知亞視已經搵咗新管理層班子接手，但全部唔係行內人。亦有亞視員工向本報透露，亞視今次搵咗大批無綫人過檔開台，又請回不少前朝臣子，雙方合作上出現問題，影響士氣。（新聞連結：　 https://bit.ly/2rltbS2　）

有見及此，今午三點，亞視高層吳雨、區偉林同曾醒明到尖沙嘴一家酒樓見傳媒。曾醒明先表示：「今日呢個唔係記者會，只係約番啲傳媒好友茶聚。」又提到今日有關亞視地震之報道，曾稱：「想同大家澄清番啲事。」

吳雨表示：「今日老闆見到報道都打嚟問咩事，仲話冇嘢寫搵呢啲嘢嚟寫，所以都有必要澄清下。簡單有兩點，第一點係話公司閂水喉，冇錢；第二就係話我哋要轉做顧問。其實由頭到尾，我哋簽嘅合約，都係話我哋係做高級顧問，負責幫公司籌備、策劃開台同埋組班底，一啲行政架構。」

吳雨表示當時有感於「高級顧問」一職難以辦事，故申請改title，所以改成他是行政總裁、區偉林任營運總監：「一路開台，一路傾嘢都好正常。依家三個月喇，開台之後啲嘢上晒軌道，行政亦都好健全，老闆就要我哋去發展海外Project，例如馬六甲、星馬市場。因為我哋自己都有呢啲工作，已經分身不下喇，所以我哋轉番去做提供意見呢方面。執行就另外有團隊。」

吳雨重申今次並非人事變動：「我不嬲都係顧問嚟，都係做番自己原本嘅工作，我仲做多咗添，我返足工0架！」

至於閂水喉傳聞，吳雨亦否認，指投資者用百億開台，「其實老闆心目中都有打算，遲下都會投資拍下劇。都唔係好明點解有呢個報道，有少少無中生有。」

至於亞視會否有裁員？吳雨斷言謂：「冇。我同區生（區偉林）都係做番顧問，行政嘅團隊就分批去做。」又指新加入一定是圈外人，否認「外行領導內行」之說。

相關報道：
【亞視大地震】CEO吳雨變顧問 藝員唔知咩事 樂瞳：按本子辦事
https://bit.ly/2rhAVoF

原本職位係顧問 吳雨：只係開台自行要求有行政職銜
https://bit.ly/2w8HPlc