民建聯貴為香港第一大黨，做佢黨員好多掣肘，前主席曾鈺成被問到係咪中共黨員，推推搪搪唔可以光明正大講清楚，成為「疑似中共黨員」；副主席蘇錦樑入官場做副局長，噚日又面對類似情況，有口難言忽然啞咗。
蘇錦樑噚日首次以商務及經濟發展局副局長身份，應前綫邀請去大埔出席街頭論壇，討論拯救中小企措施同《淫褻及不雅物品管制條例》諮詢文件。蘇錦樑話其實自己唔算處男下海，因為以前做區議員時，都參加過好多街頭論壇，所以坐喺街邊，都有似曾相識嘅感覺。

唔肯答有冇睇過

可惜被問到一個問題，蘇錦樑卻如坐針氈好驚青。論壇講者之一、《中大學生報》前總編輯曾昭偉話，政府今次諮詢《淫褻及不雅物品管制條例》，至今未有認真問過青少年意見，尤其係16歲以下青少年，佢指𡃁仔對性事十分好奇，好多時未夠秤就已經匿埋睇鹹書同四仔鹹碟，上鹹網更加唔使人教，佢哋經驗豐富，政府冇理由唔聽佢哋意見。
曾昭偉更當眾質問蘇錦樑，𡃁仔時代讀書時，有冇睇過《龍虎豹》、《老爺車》？呢啲雜誌，無可否認係好多人性知識啓蒙第一課，甚至可能係部份人集體回憶嘅經典，所以在場好多人聽到都微微嘴笑，點知蘇錦樑好似扮聽唔到，論壇主持人卿姐即時追問，要求副局老實交代，向廣大市民從實招來。

學黨主席曾鈺成

面對呢個問題，蘇錦樑似乎有難言之隱，十足曾鈺成被問係咪中共黨員咁，難以啓齒。原來有冇睇過鹹書，同係咪中共黨員，對民建聯黨員嚟講都係不能說的秘密。蘇錦樑亦學足曾鈺成，唔直接回答自己有冇睇過鹹書，只係將現行淫審制度由來盤古初開講一次，想遊花園蒙混過關。
蘇錦樑疑似睇過鹹書呢個問題，八方認為絕不能和稀泥，因為佢負責《淫褻及不雅物品管制條例》諮詢工作，正所謂沒有調查就沒有發言權，如果副局未睇過呢啲刊物，只係道聽途說，唔知道市面淫褻物品內容同流通情況，整個諮詢好可能唔夠全面，又如何切實改革現時淫審制度呢？因此當局應盡快公開蘇副局有冇睇過鹹書，唔應該好似隱瞞副局持有外國籍咁，再欺騙市民。

mailto:[email protected]