現在提起太子站，香港人會想起8.31，電影《金都》以英文名稱《My Prince Edward》命名，其宣傳海報更以頭戴防毒面具、穿上婚紗的新娘雙手擎槍，身處太子金都大廈門前迎戰，導演黃綺琳（Norris）解釋只是事有湊巧，海報是兩年前所繪畫，與社運無關，但沒想到當時用超現實畫面去表現，現在卻成為現實畫面。

《金都》誕生，源於導演黃綺琳從小就住在太子聯合廣場樓上，每日面對着金都大廈，見證太子區的發展，因為參加「首部劇情電影計劃」，Norris編寫了一個有關婚姻及太子社區的故事。Norris早前在台北出席金馬獎時接受訪問，她說起這段往事：「由細到大都住喺太子，屋企喺聯合廣場樓上，對住金都商場，劇本都係望出窗睇住金都所寫，細個時走入金都商場，都有一個夢想，就係大個要着呢條裙，到大個做姊妹、伴娘，發現原來結婚係好貼地、現實嘅事，同男朋友嗌交、同男朋友屋企人嗌交，我朋友嘅未來奶奶都係好麻煩，所以寫咗金都同結婚為題材嘅故事。」

齣戲英文名是《My Prince Edward》，整齣戲在太子拍攝，Norris說：「戲中男主角叫Edward，係Stephy（鄧麗欣）嘅王子，所以就有咁嘅戲名。」對於太子站勾起香港人沉重記憶，Norris說：「我哋參加首部劇情電影計劃時係2018年，交劇本係2017年，電影海報畫咗個女仔喺金都商場出面，着住婚紗好似打緊仗咁，揸住手槍戴住防毒面具，有朋友問我海報喺兩年前畫，點解畫咗而家境況，其實真係一個巧合，畫嘅時候用超現實去表現，但係而家個超現實變咗現實，所以真係咁啱，但唔想畀人覺得係抽水，真係兩年前已經寫，至於會唔會覺得沉重？而家『Prince Edward』嘅意思可能唔同咗，我個出發點唔係咁，只係表達對個社區嘅感情。」

現在社會受負面氣氛籠罩，Norris表示對所有創作都有影響，但不應認為巿場氣氛差，Norris說：「電影對我來講係表達方法，成為一個商業運作，然後有人入去同觀眾交流，唔好話而家社會氣氛差會影響電影行業，其實各個行業都有影響，至於創作上嘅影響一定有，而家我哋身處大時代，每日都好多事發生，每日都影響人點樣睇自己，我哋同身邊人、社會關係、對未來前景，全部嘢都會影響所有人創作，電影都會受到呢啲影響。」

戲中女主角Stephy表達對婚姻的想法，Norris表示寫劇本由自己出發，係真實個人感受，Norris說：「去到30歲，身邊好多朋友結婚，我未結婚，初時冇意識過婚姻對自己係咁重要，諗返原來細個時一直已經圍繞住我，會問點解爸媽會結婚，爸媽好內斂，唔會喺你哋面前錫或拖手，我問過阿媽，個老公係唔係政府派畀你，幾多歲有老公派，同點樣申請，到長大先認識到拍拖同婚姻。」

《金都》獲提名今屆台北金馬獎「最佳新導演」、「最佳男主角」（朱栢康）及「最佳原創電影歌曲」，Norris說：「朱栢康好激動，佢覺得第一次做主角，第一次就有提名，我哋互相都覺得大家有運氣嘅成份，開頭都覺得可能係好彩，或者某啲原因先揀我哋兩個，但我睇咗金馬影展放映場之後，我相信金馬呢個提名係非常真心，都好多謝好多觀眾去支持，同埋佢哋覺得真係好睇。」Norris表示有看過本屆金馬其他入圍新導演的作品，亦覺得入圍的作品水準非常高，製作很精緻，她說：「我自問未去到呢個水平，飛車動作我係一啲都唔識拍，台灣新導演好成熟，好有自己風格。」

內地今年杯葛金馬獎，香港電影人亦擔心影響內地發展，而取消參加金馬獎，勇於出席的Norris說：「我有聽過，我哋《金都》係香港電影發展基金，屬於創意香港嘅『首部劇情電影計劃』，325萬製作費，全數係創意香港畀我哋，報名與否唔係我去考慮。台北金馬獎一向都開放畀華語電影，我覺得大家想參加就參加，唔想參加就唔參加，如果有機會拍到第二部作品，而又可以參與金馬獎，都會想去。」《金都》是本土題材，但Norris強調自己並非刻意，她說：「電影不應標榜是否本土，北歐小國電影我唔識拍，拍香港樓下我就識拍，我唔係專登拍本土，希望將來自己有國際視野，暫時能力上只能拍香港、廣東話題材。」

場地提供：電光影裡書店（台北）

採訪：張明、攝影：仇志德、攝錄：廖達燊

-----------------------------
《2019高級珠寶鑑賞誌》
點擊即睇過百款鑽飾名錶
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇