大家都知李克勤係紅魔鬼曼聯嘅超級Fans，咁佢囝囝梗係都鍾意足球啦。估唔到佢7歲嘅細仔李力司(Rex)，都遺傳咗老竇對足球嘅熱誠，都好鍾意踢波喎！

而Rex唔單止鍾意，仲勁好波，將一班同齡嘅小朋友耍到陀陀擰。今日克勤老婆盧淑儀就喺ig度Post咗條Rex踢波嘅片，只見片中着住紅衫3號仔嘅佢，喺四名防守球員包圍下毫無懼色左扭右扣，再在門將出迎之前，用右腳輕輕一「彈」，個波就往遠柱死角入網，功架十足，送佢兩個字：厲害！媽咪盧淑儀睇到Rex入波就大嗌咗出嚟，仲留言：「Top scorer.......super Rex! Well done!」

媽媽就係香港陪住兩個仔，剛喺香港完成入行30周年演唱會嘅爸爸克勤就馬不停蹄咁去咗大陸開工，佢亦都喺ig上載咗一段短片，佢話凌晨4點半起身，準備出發到山東臨沂，雖然克勤話未瞓醒，眼都睜唔大，但就因為有工開而好開心。