AO出身嘅娥特，果然同政務官出身嘅局長特別志趣相投（勞福局局長羅致光當然係異數...）。林鄭身在北京參觀國家行政學院為公務員學院取經之際，公務員事務局局長羅智光（Joshua）亦展開歐洲訪問行程，主要了解公務員管理同培訓嘅情況，同娥特分頭出擊、中西合璧。

Joshua局長首站抵達芬蘭赫爾辛基，除咗同芬蘭財政部負責政府人力資源管理嘅常任秘書長Paivi Nerg會面，就公務員嘅管理同培訓交流，亦同外交部美洲及亞洲處處長Kimmo Lahdevirta進行午餐會議，並到訪芬蘭公共管理學院，了解學院為當地公務員提供嘅培訓課程和設施。

佢其後會轉至法國，會到訪巴黎政治學院了解培育未來法國政府領袖方面嘅經驗，並訪問法國公務行動及公共財務部，商討公務員嘅管理，以及到斯特拉斯堡嘅法國國家行政學院及法國國立地方行政研究學院，了解兩間學院為高級公務員制訂嘅培訓策略同課程。