石油價格再破底，繼紐約期油（WTI）後，布蘭特期油（Brent）亦齊齊跌穿50元（美元．下同）。截至1月9日，WTI收市報48.36元，開市期間最低見47.16元；Brent收市報50.11元，最低見48.9。
能源價格中短期嘅重要性在於，俄羅斯究竟會唔會出現經濟危機，乃至美國會唔會延後加息，能源價格都係重要考慮因素。上星期提及，要估石油見底未，可以從contango趨勢及投機者手影以管窺豹。而1月9日口價亦有一個重要象徵意義，因為從技術面睇，WTI十年長期走勢，48元附近正正係長期升勢底部。當日剛剛跌穿，收市又企番喺48元之上。

油價很大機會已見底

雖然油價繼續破底，但炒Cash-and-Carry Arbitrage嘅囤積居奇可能已悄悄然展開。據路透社報道，幾間全球頂級嘅大宗商品貿易商：維多石油集團、荷蘭皇家殼牌、瑞士托克已經開始預訂十二個月後嘅油輪。
瑞士托克最少租咗一艘超大型油輪VLCC（運載量200萬桶）；皇家荷蘭殼牌租咗兩艘VLCC；而維多石油集團租咗一艘VLCC同一艘TI大洋洲號（運載量300萬桶）。
世界最巨型油輪原本係董建華父親船王董浩雲接手嘅諾克．奈維斯號（Knock Nevis），但2010年被拆後，TI級超級油輪就成為現時全球最大嘅海運油輪。TI級油輪一共有四隻，分別係TI非洲號（TI Africa）、TI亞洲號（TI Asia）、TI歐洲號（TI Europe）同TI大洋洲號（TI Oceania）。
半年前油價未大插時，由中東海運至日本嘅航線，租大型油輪每日租金唔使20,000元，但去到去年底，油價大插後中國瘋狂撈底囤油，油輪租金被扯到97,000元。而上述三大公司現時租油輪嘅租金，因為係遠期，所以唔使40,000元。先唔計保險、人工等各種雜費，粗略地計，若擺200萬桶油一日租金40,000元，每日成本0.02元，囤半年成本3.6元。即係話期油contango半年掰價有4元以上，就有機會出現撈底囤油現象。
上星期WTI半年期貨價差徘徊3至4元，Brent半年期貨價差5至6元。但今個星期截至1月9日，WIT半年期貨價差已超過4元，Brent半年期貨價差已接近7元，再加埋大戶手影、技術走勢三者配合，有理由相信油價已經在底部附近，就算再跌恐怕亦唔多。

Mr. Tregunter