樂壇有個周柏豪，商界同樣有個周柏豪。

尚有兩個多月就21歲嘅洗米仔周柏豪，性格外向，說話成熟，係人稱「洗米華」、太陽世紀（1383）主席周焯華之子，洗米華因為周旋在正印陳慧玲（Heidi）同Mandy Lieu之間，近年成為娛樂版紅人。

問柏豪可有因為父親「走紅」，創業過程受影響或障礙？柏豪就話：「冇喎！唔會有障礙！同埋唔會埋怨，因為屋企有資源俾我去外國，令我有更闊嘅視野，可以講創意，如果要養家就好難講創意，會變為防守，我o依家可以打進攻。」

柏豪曾經講過，細個嘅時候，好少機會同爸爸相處，但佢肯定爸爸對自己有好大影響：「係好嘅影響，雖然自己唔係得佢一個屋企人，佢唔係我惟一學嘢嘅資源，但佢做嘢方式，堅持、進攻，佢嘅行動比言語重要，好多老竇只講，但講咗唔做等於廢話。」

跟爸爸最大話題是甚麼？柏豪即笑謂：「你同你老竇會傾咩吖？我哋好少講私人嘢，生意我唔會問佢，開記者會都係幾日前同佢講，都係講生活上嘅嘢，冇乜特別。」洗米仔又話，同父異母嘅妹妹都有獨立思想，佢亦有灌輸妹妹唔好被傳統框框影響思想，想做咩都可以去做。