上周二朝，我叫大家「不問價追東亞（023）」，叫買因為我覺得班分析員估錯晒嗰日中午出業績嘅東亞銀行全年業績。東亞上周一收30.45元，篇文出街就裂口高開喺31.2元。到中午東亞出業績，真係一如我所料，啲大行分析員錯晒，佢哋平均預咗每股盈利倒退，點知不但冇，仲要有增長，總體盈利去到破紀錄水平。佢哋之前就話大陸冇水，銀行難做，而唔明就係因大陸冇水，故東亞以前受咗大把存款但搵唔到好人借嘅港商銀行將大把生意。

分析員估錯　急轉軚

東亞出咗業績後，股價下午即飆，收市前才落番。有fans收市後問我點，我話若有睇清楚我篇文，股價要升最關鍵就係啲分析員淆底要重新檢討盈利及目標價預測嗰陣，就係東亞要升之時。上周三各行分析員開始調高盈利及目標價預測，東亞股價亦升上33.4元。短炒算有交代。
做基本分析，可能要捱價捱好耐，有時我諗如果唔係靠Ben Graham嘅價值投資法揀股推介，而真係做啲莊家嘅打手，做財演會唔會易做啲。嗰啲問我「你背後係咪有個莊」嘅朋友，我只可以話，唔知700億元市值背後嘅東亞有冇莊，但今次憑「不問價追」呢四隻字講東亞，如果真係有莊，嗰啲騰訊（700）、中移動（941）、滙控（005）嘅莊都應該好快會叫我幫佢哋唱好囉！因為我就係咁powerful！
最後，我覺得啲分析員最正嘅地方，係之前話因大陸冇水所以東亞盈利會唔得，出咗業績後就話東亞今年唔會好似2013年咁勁，因為大陸缺錢情況會紓緩。冇錢話沽，有錢又係沽，你哋玩晒，信就死。其實國家要陰乾最大不能不救嘅銀行及佢哋賣產品建成嘅影子銀行系統，大量嘅存款將會湧入東亞呢啲服務祖國嘅港資銀行，所以將會大把生意做，如果唔係，東亞母公司就唔使無端端加東亞大陸分部嘅資本啦。大陸資金分配系統變緊，paradigm shift呀！

孫柏文
獨立股評人
http://facebook.com/shuen
本欄逢周二刊出