天氣凍凍哋，至啱做運動，出一身汗。噚日無國界醫生搞咗個野外定向比賽，各大黨派都踴躍參與，關注組就由湯大狀領軍，帶住三個助手組成「A45」隊。

馬丁服輸　福記請客

白鴿黨李馬丁就拍住啲第二梯隊，包括范國威、張賢登同胡志偉，組成咗「民主先鋒」隊；民建聯今次冇大人物撐場，只得李慧琼同張國鈞等二幫組咗「民主建港隊」。而身為主禮嘉賓嘅黃仁龍司長，就一身黑色型仔look亮相，可惜佢着住對皮鞋，如果唔係應該叫佢落場玩埋一份。
結果呢，關注組未組黨就先贏其他黨一仗，A45成功奪魁。湯大狀喺遊戲開始前，已經好有信心，話玩野外定向最緊要係掌握「時間表」同「路線圖」，唔知係咪呢兩個錦囊令佢哋殺敗對手。行慣山嘅馬丁點解會輸？原來佢中途同隊友失散咗，搵人多過搵checkpoint。雖然輸咗，但佢好有大將之風，願賭服輸，請湯大狀哋去福臨門食番餐勁，一於友誼第一、比賽第二。
講開黨派，香港人人都話要組黨，無論左派工聯會以及中間派嘅泛聯盟，都趁高興，特區政壇咁細，要塞晒所有政黨，其實都好鬼迫㗎。八方知道揚言要喺三月組黨嘅45條關注組後日會有個吹風會，講吓籌備工作嘅進展，以免令人以為佢哋得個講字，冇料到。

大狀埋堆　中央怕怕

聽聞喺中央心目中，最緊張嘅就係呢班大狀，其中一個原因係台灣民進黨嘅阿扁同謝長廷都係律師，呂秀蓮又係法學碩士，一班法律界人士走埋一齊真係好煩，佢哋又難傾又唔妥協，民進黨有辦你睇。當然有人認為台灣律師唔係講法治，同湯狀哋冇得比。除咗律師背景，政改一役，關注組立場清晰取態強硬，講到明唔會轉軚，咁嘅舉動，梗係令中央擔心啦，唔知應該點同佢哋定性。
至於工聯會同泛聯盟，組黨後一定唔會同中央反枱，北京理應唔使驚，但係慣咗一黨獨大同一黨專政嘅共產黨，忽然發覺香港呢個彈丸之地，竟然有乜黨物黨咁多黨，周身都唔自在。對佢哋嚟講，黨係有專利嘅，梗係少隻香爐少隻鬼好啦。

傳真︰2623-9278
電郵︰[email protected]