【新增動新聞】
又係各位網絡神探出動嘅時候啦！呢張海報到底有咩玄機？有施治、基奧特、梅迪薩卡、奧斯爾同阿歷斯山齊士，幾齊人吖…登登登櫈，重點係呢張海報宣傳緊下季新波衫！話說阿仙奴球衣贊助商Puma原定6月21日先會推出宣傳攻勢，但網上近日流傳呢張宣傳下季新波衫嘅海報，仲唔係代表續約事宜遲遲未解決嘅奧燒同山神來季會留低？若然屬實，對廠迷嚟講絕對係兩大喜訊！

講開奧燒同山神，兩位最近同隊友們為咗宣傳阿仙奴今夏到邊上海同北京嘅大中華之行，喺訓練基地跟武僧們學耍功夫，其中山神最入型入格，耍拳一樣勁度十足！耍功夫還耍功夫，廠迷最希望你哋唔好喺去留問題耍太極就得啦！