最近，由環境運動委員會聯同環境局和環保署舉辦嘅「減廢大挑機」網上宣傳活動，引嚟咗唔少知名人士挑機，建制派同民主派立法會議員都有玩。「減廢大挑機」叫人連續7日影低自己嘅減廢日常放上社交網站，噚日民建聯小花鄧麗玲玩到第4日，竟然影咗張用即棄餐具嘅相，話呢個係佢嘅減廢日常。

鄧麗玲放上facebook張相寫住「食得曬，先好嗌，惜食是福」，仲話以前屋企人教落，食剩嘢第日會嫁豆皮老公喎，佢嘅「減廢大挑機」就係話自己食哂啲嘢無浪費到食物。之但係，留心睇睇，佢雖然就食哂啲嘢，不過就用咗即棄碟同埋餐具，小花hashtag 有寫住「#叫咗堂食」同埋「#點解俾一次性餐具我」㗎。

今日小花就再上載咗一張自備餐具嘅相，話自己上一個post係為咗帶出堂食提供即棄餐具嘅問題喎，仲話係自己無表達清楚，更加因為咁而「真誠致歉」，重新玩過一次減廢大挑機咁話。