香港鐳射醫學會會長、眼科專科醫生陳偉民指，光學美容儀器涉及能量，可造成燙傷或灼傷，令皮膚留下疤痕、老化，甚至患上皮膚癌等；隨着激光美容平民化，出現意外的風險增加，「今時今日買激光機好似買冷氣機咁，唔使話畀政府聽，你鍾意買部喺屋企用都得，用機嘅人亦都唔使受過咩訓練，我同你聽日都可以轉工去用部機」。

他解釋，現時美容院的光學美容儀器鮮由醫生操作，「好多可能係美容師，質素好參差，相反如果係醫生做就會好小心，知道邊啲人適合做先會畀佢做，唔適合就叫佢走，但係美容院就唔係咁，最緊要吸咗你入嚟先」。
陳偉民指光學美容儀器「殺傷力」大，一名30多歲的男技師，數年前在診所維修一台美容激光機時誤觸按鈕，右眼被激光所傷，「一秒鐘啫，佢就失去咗視力喇，啪一聲，視網膜上面穿咗個窿，係黃斑點嘅位置。佢當時好痛，即刻睇唔到嘢，雖然做手術修補番，但係啲細胞都死咗。」
他表示，該男士受傷時只入職三個月，現時右眼只剩下一成視力，不能看清眼前人的模樣，「連人哋嘅鼻同眼都睇唔到。」

香港整容外科及醫學美容醫學會會長、整形外科專科醫生金永強同意激光力量驚人，4年前一名年約40歲的家庭主婦接受激光洗眉，結果「黑眉變白眉」，「打完（激光）之後，條眉生咗個「瘌」，有隻肉芽走出嚟，本來黑眉變咗嚿白色嘢，可能係永久性。」事主其後接受多次類固醇注射，令肉芽消退，治療過程至少一年。
金永強醫生又說：「做激光最緊要係由受過訓練嘅醫生嚟做，同埋留意係咪用最靚嘅機器，會唔會部機係發展中國家做嘅呢？維修保養係點嘅呢？用咩度數佢知唔知呢？巿民要清楚」。

傳統療程（如豐胸、雙眼皮等）
2008年：18
2009年：21
2010年首4個月：10

注射式美容（如肉毒桿菌、羊胎素等）
2008年：15
2009年：16
2010年首4個月：11

光學美容（如激光、彩光等）
2008年：88
2009年：86
2010年首4個月：26

果酸療程（如果酸、骨膠原等）
2008年：3
2009年：1
2010年首4個月：1

-總數-
2008年：124
2009年：124
2010年首4個月：48

資料來源：消費者委員會