台灣人氣樂隊五月天鼓手冠佑（原名劉浩明），同太太王行芝前日涉及一宗買贓車事件而惹上麻煩，當地警方追查一宗偷車集團案，冠佑有架BMW740Li嘅車，同一架Camry2.0都係幫襯同一間車行購買，仲係以超筍價錢買入，其中架BMW警方已經證實係贓車。冠佑前日發聲明，話係朋友一年幾前欠款冇錢還，所以用二手車嚟抵債，佢係完全唔知情，據知冠佑前晚喺警局落咗近兩小時口供。

拘捕車行負責人

台中縣警方噚日繼續追查偷車集團案，冠佑聲稱唔知買嘅係贓車，但警方查出主要嫌疑犯將另外一部舊BMW318過戶到王行芝名下，然後就將呢個318車牌掛到BMW740Li車上，雙方唔單止有買賣行為，仲確實使用贓車，所以先將冠佑同王行芝依涉嫌贓物罪送法辦。不過，呢間車行嘅負責人江元章噚日被帶去警署協助調查，佢同警方強調冠佑確實唔知道BMW740Li係贓車。
噚日冠佑再透過公司發出聲明話：「問題車的車牌，是三周前才由車商過戶到行芝名下，在此之前，行芝未曾擁有過任何一輛BMW，所有關於過戶與車牌的處理手續，都是由車商來收取證件後辦理的。」佢強調自己都係受害人，希望早日還佢清白。
警方又話，目前除查扣BMW740Li外，王行芝所使用嘅TOYOTACamry，將暫時由警方託管。至於懸掛假車牌，就違反《交通管理處罰條例》，可被罰3,600新台幣。另外，根據台灣法例，若喺知情下買入贓車，最高會被判入獄五年。