韓國演藝圈近日掀起「#Metoo」反性侵、性騷擾運動，多名男星被爆料曾涉性騷擾，當中曾演出《逆權大狀》、《哭聲》等韓片嘅男星郭度沅，早前被指涉嫌於話劇團演出時曾言語間性騷擾年輕女演員，並對工作人員施暴，當時郭度沅透過所屬事務所否認傳聞，指郭度沅亦積極支持「#Metoo」運動，但認為將虛假事實偽裝成「#Metoo」運動，反而破壞咗運動嘅本質。

郭度沅所屬事務所老闆今日於網上留言，指曾控告著名話劇監製李潤澤性騷擾嘅其中4名受害人，要脅曾同屬該話劇團嘅郭度沅，要求郭度沅俾錢佢哋，並表示：「郭度沅係劇團中最紅嘅人，大家要一齊活落去，我哋放你一條生路。」又多次以電話、訊息威脅郭度沅。事務所老闆指原打算為受害人籌備律師費，豈料對方只要郭度沅俾錢佢哋就夠，坦言擔心「#Metoo」運動變質。

更多韓流，喺晒《娛果》
http://fb.com/appledailyent