上季最後一場谷戰，由柏寶騎文廐「鴻福滿滿」排二檔勝出。事隔一年，今晚尾場二班千二米，雖然唔係開出呢對騎練，但就都係由二檔馬取勝。
主角「你知我心」係騎練郭能同告達理合作馬，5.2倍一放到底，當中大告憑此駒食谷草尾糊，打破自6月3日「環保戰士」後一個月頭馬荒，而郭能連同第三場贏苗廐「珍珠有利」在內，亦起孖告別今季谷戰。
雷神輸兩分給楊明綸，失落今晚騎師王，好大程度同尾場騎2.8倍擂台躉蔡廐「活力寶」受阻有關，早段前列馬群互相搶位之際，此駒突然被擠壓至勒避大後退，大大話話失去咗五、六個馬位，直路力追既追唔到「你知我心」，亦趕唔過沿欄直上一步不蝕之亞軍馬「有醒」，「活力寶」只得季軍，大熱門初次渡江未竟全功，搏來搏去始終唔能夠於二班贏馬。
今場第四名落喺「喜喜寶」身上，四重彩10,498元。