股東會臨完場,四叔突然冇頭冇尾咁講咗句:「有好多講法(華華推測係回應有人暗示佢投機呢樣嘢),話投機賺錢唔啱」跟住又話:「我有三大投資項目,第一項係老本行恒地,雖然近年冇大增長,但年年有錢賺,夠穩陣;第二項係煤氣,每年都有好多新項目,大陸發展潛力大,香港業務又穩定;至於第三項,就係私人投資企業(兆基財經)。」
四叔再講:「我呢個私人投資,好健康又好有秩序,買賣正股之餘,又利用好多工具套戥,所以個市升我有錢賺,個市跌我又有錢賺。」若果唔係,04年成立嘅兆基財經,資產總值又點由500億暴漲至𠵱家嘅1200幾億呢?
心多嘅華華聽到呢度,就諗起上個禮拜誠哥一片苦心叫香港同內地投資者,唔好忘記歷史,最緊要量力而為,尤其嗰句「香港人要實實在在為香港做長遠有利的事。」又話香港唔可以靠炒股同投機嚟維持繁榮,華華唔知道四叔係咪聽見誠哥咁講,先有感而發,唔知遲吓仲有冇人有嘢同記者(或對方)講?
[email protected]