被喻為今年最恐怖嘅韓片《瘋人院逐個捉》(韓文名：昆池岩)，大前日正式開畫，即時成為韓國首日票房冠軍。

《瘋人院逐個捉》被喻為世界七大恐怖禁地之一，同日本青森自殺森林、軍艦島等齊名，CNN亦報道有唔少人嚟到呢處感受恐怖體驗，事實上《瘋人院逐個捉》係描寫昆池岩上嘅一間精神病院，當地傳說因為有病患陸續離奇死亡，令到呢間精神病院喺90年代關閉大吉，有傳係因為醫生虐待精神病患者，才出現死亡事件。由於傳說傳到甚囂塵上，令到唔少自稱大膽人士都嚟到呢處挑戰膽量。

而電影就正正講七人成行嘅恐怖體驗團喺呢度探險時，同時更進行直播，主持人為咗吸引更多人觀看，就暗中設計，令到體驗團深入醫院禁地，遇到嘅恐佈及失控事件。

電影由《奇談》導演鄭凡植執導，主演演員唔算出名，包括文藝媛、朴志鉉、朴成勳等，電影吸引唔少年青人捧場，所以一開畫即成功進佔票房冠軍，而且電影仲令到戲院出現一個古怪現象，就係唔少購買爆谷睇電影嘅觀眾，因為被劇情嚇親，搞到戲院遍地都出現倒晒落地嘅爆谷情況，好鬼誇張。

唔少網民都拍下呢個壯觀情況，又留言指連男觀眾都被嚇到喊，有戲院兼職嘅人就留言指每次《瘋人院逐個捉》完場後，佢哋打掃就最辛苦。而網民仲話個場景就好似《鬼怪》中嘅孔劉當日同金高恩喺戲院睇《屍殺列車》時，被片中嘅喪屍嚇到成桶爆谷倒晒落地上。

《瘋人院逐個捉》將於下月19號喺香港上映，到時唔知會唔會亦出現遍地爆谷嘅情況呢？

《瘋人院逐個捉》預告片： https://bit.ly/2pNKye4

更多韓流，喺晒《娛果》
http://fb.com/appledailyent