當年今日
關於我們

【30幾年冇停過】78歲何守信暫別娛樂圈 想畀多啲時間陪太太

蘋果日報 2018/06/12 15:07

何守信陳淑蘭北極光

何守信(何B)同體育評述員丹尼爾今日最後一次主持港台電台節目《開心日報》,其他主持林超榮、陳淑蘭(蘭子)、梁榮忠同杜雯惠等為佢哋舉行歡送活動,蘭子仲吻別何B。
何守信話自己今年78歲,好想放個悠長假期:「做咗呢個節目7年,公司對我好好,不過自己一早預咗2018年下半年體驗完全唔做嘢嘅感覺,冇特別原因嘅。」佢話8月中會返溫哥華,畀多啲時間陪太太陳麗斯:「我哋9月會去黃刀(Yellow Knife)睇北極光,之後11月會去個長途啲嘅旅行。」
問佢係咪唔會返嚟做節目?何B笑謂:「未有咩計劃,試吓唔做嘢係咪真係咁舒服先。自己30幾年來都冇停過,以前我唔知早餐係咩嚟,到加入《開心日報》先改變我嘅生活習慣,日日早起。」佢仲話唔會怕悶,雖然做到老學到老,但唔可以畀一份工限住自己。蘭子笑謂自己係最遲知道何B唔做嘅:「都幾突然,我仲覺得好似發緊夢咁,唔捨得,我叫佢一年好返嚟開咪啦。」
蘭子透露自己有社交恐懼症,好多工作都令佢好大壓力,但主持《開心日報》就好舒服:「好似屋企人,返嚟吹吓水咁。」蘭子透露最近報讀文化創意,拓展自己潛能:「每個月喺中國上幾日堂,會去唔同地方。啱啱去完北京玩野外求生,班上我最老,不過我輸人唔輸陣,最後我都完成到呀。」
empty
何守信8月會返溫哥華,9月便會陪太太陳麗斯一齊去睇北極光。(攝影:仇志德)
empty
何守信已經78歲,希望抽多些時間陪太太。(資料圖片)
empty
何守信主持港台《開心日報》已有7年時間,一班同事為他舉行歡送派對。
empty
主持林超榮、陳淑蘭、梁榮忠同杜雯惠等都話唔捨得何B。
empty
何B話想試吓唔做嘢,係咪真係咁舒服。
empty
蘭子透露自己患有社交恐懼症。