由古天樂、張繼聰、姜皓文、宣萱、劉心悠 、顏卓靈同安志杰等主演嘅電影《犯罪現場》，今日喺火炭由監製爾冬陞帶領進行開鏡拜神儀式。

古天樂喺戲中飾演劫匪，同宣萱有感情戲，古仔話：「故事猜誰是兇手，今次打劫場面好大陣仗，將會喺鬧市封街拍攝，到時全世界都知喺邊度拍，已經申請咗封鎖場地，自己會攞機關槍，打鬥場面唔算多，主要槍戰械鬥。」古仔透露同宣萱有感情戲，但冇親熱戲。對於會否盡量避免用道具銀紙拍攝，古仔話：「本身都冇用銀紙，故事未打劫成功已經發生殺人，同埋係打劫珠寶。」

宣萱喺戲中飾演弱視角色，宣萱話：「我係要比古仔揼，本身我喺戲裏面睇嘢唔清楚，所以都冇還擊之力，睇到我會受傷。」宣萱指識咗古仔咁多年，對方應該識得留力，宣萱話：「但係如果係我出手，我怕會太投入會用真力。」

再做爸爸嘅安志杰話，o依家老婆Jessica C湊BB好忙，安志杰表示擔心兩歲嘅大女呷醋，但相反大女懂得照顧細佬，安志杰話：「BB暫時未改名，媽咪會搵師傅幫佢改。」問到安志杰會唔會再生多個，佢擰頭話順其自然，至於如何獎勵太太，安志杰話：「佢要乜都俾佢，佢係我心目中嘅wonder woman ，佢回復得好快，已經食雪糕，報道話佢甩頭髮冇可能，佢頭髮多過我。」安志杰今次我喺戲裏面同古仔有對手戲，主要係激烈槍戰，安志杰話o依家做咗爸爸，係冇以前咁搏命，盡量唔做太危險動作，為家庭而錫身。

今日面上有受傷造型嘅張繼聰飾演警察，劉心悠飾演一個雀鳥專家，負責教張繼聰同鸚鵡溝通，張繼聰喺戲裏面要俾鸚鵡咬手指，張繼聰話：「自己都好驚， 鸚鵡主人話唔痛，但係我畀隻手指佢咬，自己都要忍住。」劉心悠話雖然未同鸚鵡拍攝戲份，但自己擔心，佢話：「唔驚雀鳥，反而要努力扮演好一個專家角色。」

精選娛聞，喺晒《娛果》
http://fb.com/appledailyent