對於唔少特區政商界「紅」人嚟講，中共建政60年嘅慶典大過天，各樣活動統統讓路。八方聽聞，唔少人已經將嚟緊嘅9月29日、30日同10月1日列為唔做嘢日，因為特區訪京團好可能喺9月29日成行，為免到時有公務纏身，梗係預先安排好，等一收到請柬，就可以成行。不過，就算屆時有得上京，都有等級之分，訪京團有200至300個名額，以數量計呢張飛唔算好矜貴；反而好多人關注當中有幾多人同時獲邀閱兵，因為有得閱兵先至係真正嘅身份象徵。

參與閱兵凸顯身價

唔少親中人士8月時已經四出打探，想了解特區訪京團幾時成行，但一直未獲回應，顯然十．一活動都係中央高度保密項目。但最近終於傳來消息，有政協委員引述接近北京消息人士講，特區訪京團好可能喺9月29日起行，預料10月1日慶典完咗就散水，等大家可以即晚趕返香港參加10月2日喺特區舉行嘅慶祝活動。雖然暫時未有實際行程，但預留呢三日就冇死。
八方又聽聞，今年由煲呔親自帶隊嘅訪京團約200至300人，相信見慣見熟嘅特區紅人好易上榜。有親中人士反而關心，究竟當中有幾多人有機會參與閱兵？據聞閱兵入場券寥寥可數，有幸入場者肯定係中央愛將，唔知幾位下屆特首大熱門係咪座上客？

泛民隨團有in有out

至於有冇泛民中人，有親中人士揚言一定有，因為訪京團以各界人士名義成行，唔少泛民中人都係專業人士，可以用另一個身份獲邀。其實04年獲邀訪京慶祝建政嘅人士就有成10名泛民成員，除咗民主黨副主席單仲偕，亦有當時尚未組黨嘅45條關注組四大狀。事隔五年，關注組變身公民黨，同政府唔太啱key，四大狀再獲邀嘅機會未被睇好，反而大家會留意公民黨新星陳淑莊會唔會獲中央「寵幸」。白鴿黨肥仔明啱啱攞咗銀紫荊，就算獲邀亦唔出奇，但八方覺得長毛同毓民等就唔使諗喇。
mailto:[email protected]