年初七係團拜好日子，特首林鄭月娥今朝至中午都連走三場，而佢喺中總果壇團拜活動上，就被中總會長蔡冠深揭秘，蔡冠深話呀，娥特已經答應未來一年出席四場中總搞嘅活動，包括喺4月20日出席大灣區論壇，澳門特首崔世安、廣東省省長馬興瑞同發改委主任何立峰都獲邀來港出席。

而喺4至5月以及6月，林鄭亦會分別到雅加達同法國出席「一帶一路」論壇，8月喺香港舉辦嘅世界華商大會，討論一帶一路同大灣區問題，林鄭亦會捧場，難怪蔡冠深話林鄭好畀面中總。

又咁講，中總喺一眾商會中，嗰枝愛國愛港紅色旗幟舉得最高最挺，唔通特區之首，夠膽唔同呢面紅旗「行埋」咩？林鄭亦好識做咁大讚中總多年來對香港經濟作出貢獻。