信奉上帝的鍾惠玲，至少在天堂邊緣與上帝開過九次會。天堂雖美，人間卻更有趣，所以每次「散會」，鍾惠玲定必急急「折返」，繼續她在紅塵裏未完的人道工作。沒有人知道下一次「開會」日期，惟有努力活在今日，致力培訓人道新血，鍾惠玲的心願是「世間無病人」：「就算係打個八折，都好吖！」

身為全球第一個女性文件鑑證專家，鍾惠玲在英、美獲獎無數，原本安穩地在政府化驗所任職，87年卻突然患上紅斑狼瘡症，陷入了長達三年八個月的痛苦歲月。「甩頭髮、虹膜炎、關節痛、發高燒去到106度甚至昏迷。我經歷過好多傷痛，其間同上帝至少開過九次會，好慶幸最終可以執番條命。」
切身之痛令她明白病人之苦，90年病情好轉，她決定每逢周六在北角住所搞私人聚會，鼓勵重症病人。最初只有十數位病者及家人參加，好事傳千里，參與人數直線上升，「試過有成70、80人嚟咗我屋企，逼爆間屋，可能違反消防條例㖭呀」。
除了家屬間的分享，鍾惠玲也邀得醫師駐場為病人解答疑難，贈醫施藥。她記得當時奶奶對她的「創舉」也憂心忡忡，「佢見到有啲病人啲皮膚好差，或者冇咗隻手指，仲要嚟用我哋個洗手間，都好驚會傳染o架，所以我都要同佢解釋番冇事嘅、唔會傳染嘅」。
身為病人，本應多休息，她卻把時間全數獻出素未謀面的病人，鍾惠玲不覺得犧牲大：「我好感恩，自己資源夠，好多朋友甚至細佬係醫生，又遇上好多高人，先至執番條命，但其他人未必好似我咁幸運，好需要其他人幫助。我死剩把口吖嘛，梗係要用嚟安慰人、鼓勵一吓同路人。」
私人聚會舉辦一年後好評如潮，鍾惠玲索性在91年創辦「再生會」，關懷及照顧長期病患者。媽媽的身教對她影響至深：「我記得佢慳埋慳埋，就畀錢啲親戚睇醫生，甚至幫住喺隔籬唔識嘅伯伯煮飯煲湯、洗衫洗褲甚至搞埋殮葬，呢啲事對我影響都好大。」

對鍾惠玲而言，明天就在今日；去年10月她再一次與上帝「開會」，幸而又成功逃過「留堂」厄運。「生命可以好脆弱，我都唔知聽日會唔會就咁就走咗去，所以要盡力做好每一日。」要「服侍」的人多，時間卻太少，鍾惠玲目前專注培訓新血，希望人道工作有更多繼承者，「呢方面一定要薪火相傳」。
鍾惠玲去年獲紅十字會及香港電台頒發「香港人道年獎」，表揚她過去廿年來無私奉獻。今年的「香港人道年獎」下月5日截止提名，鍾惠玲呼籲市民提名身邊的好人好事參賽，「幫人冇分層次，只要係關心到人，就算只係照顧吓鄰居，發揮守望相助精神，都係一件好事」。無論是捨己救人、照顧老弱、對傷病者不離不棄，抑或致力維護人類尊嚴，都是人道行為，鍾惠玲希望表彰社會的好人好事，把無私的人道行為發揚光大。「助人為快樂之本，如果人人都肯去幫人，社會正能量一定大增。」記者許偉賢