吳君如同情:好慘㗎,好明白男仔需要

蘋果日報 2003/10/04 00:00


吳啟華懷疑北上召妓的消息曝光後,令不少圈中人大感愕然,但身為吳啟華好友的阮兆祥、唐文龍和湯盈盈都力撐好友,吳君如更指好明白男仔的需要。
吳君如: 唔好攻擊佢啦,好慘㗎,我拍完《金雞》好明白男仔嘅需要,藝人就麻煩啲,對社會有影響嘛,惟有小心啲啦。

阮兆祥: 論啟華嘅外形各樣都唔需要咁做,佢同羅小姐都好恩愛,我相信我朋友,我認識嘅啟華係唔會咁做,冇可能。我平時返大陸做嘢啲女仔都會行埋嚟蹺住我隻手影相,內地嘅觀眾好熱情,所以俾人影到就口同鼻拗,啲報道對啟華嘅聲譽有一定影響,但你點知人哋做訪問嘅時候有冇收錢呢?

湯盈盈: 我唔信,啟華咁靚仔使乜去召妓。(記者指該女公關相貌不錯)咁我都係靚女啦!佢都冇搞我,佢個人咁helpful,唔覺得佢個人咁花弗。

杜汶澤: 叫雞係個人嗜好,公平啲嚟講,吳啟華呢件事唔關觀眾事,只會影響佢嘅伴侶同埋僱主,如果呢兩方面都覺得冇問題,基本上係唔關我或者觀眾事嘅。

鄭裕玲: 佢開心咪得囉,我睇化咗,唔好乜嘢都問我,不過邊個藝人咁做我反而有興趣知喎。

唐文龍: 我身為佢朋友會撐佢,我唔信。人一出世就有誘惑,誘惑係日日都有,每個人有自己方法去解決,有時登台老闆會叫一齊去玩,卡拉OK、Disco就冇所謂,同埋自己知道邊度應該去,邊度唔應該去。
empty
湯盈盈
empty
唐文龍