【韓流】花心思讀劇本 玄彬讚朴信惠充滿正能量
朴信惠阿爾罕布拉宮的回憶玄彬
《阿爾罕布拉宮的回憶》已喺韓國熱播,港劇迷亦可於Netflix觀看
由韓劇《秘密花園》男星玄彬孖女星朴信惠主演嘅tvN新劇《阿爾罕布拉宮的回憶》,於今個月1號首播,港迷可於Netflix同日追看,每周上架最新兩集。玄彬和朴信惠日前抽空接受訪問,當中大談拍劇時嘅經過及首次合作嘅感受。
玄彬對上一次拍劇已係三年前嘅《海德哲基爾與我》,之後佢就專注拍電影,對於今次重返公仔箱,玄彬就話:「我一直都想同導演安吉鎬、編劇宋在貞合作,而且今次拍攝地點和主題都很吸引人,就我所知,今次係第一齣運用擴增實境嘅韓劇,我也特別好奇,要如何向觀眾介紹新主題,又不失娛樂性。更重要嘅係,我好喜歡呢個劇本,所以更希望參與其中。」
玄彬指《阿爾罕布拉宮的回憶》同其他韓劇最大差異就喺擴增實境呢個主題,雖然一般人將呢部戲歸類為懸疑愛情劇,但其實內容融合奇幻、浪漫、動作等多種類型,戲中除了懸疑元素,視覺特效亦都好吸睛,對觀眾而言應該娛樂性十足。劇中玄彬有唔少動作戲,佢話:「所幸我之前有拍動作戲嘅經驗,因此唔需要準備太多。不過我今次花更多時間深入閱讀劇本,因為唔少戲份要喺一句台詞內吐露好多情緒,我喺前後兩天對同一句台詞嘅感受也許就不同,要花更多時間思索哪種情緒最適合表達。每次拿到新一集嘅劇本,我都會從第一集再讀一次所有內容,讀劇本花咗很多時間。」
問到邊個場口令佢最困難或印象最深刻時,玄彬就話:「我記得第一場戲係初次介紹遊戲,花咗許多時間才拍完,場面很大,而且和外國演員對戲,因此印象最深刻,我好期待睇到後製完成嘅結果。」
對於初次同朴信惠合作,玄彬大讚對方充滿精神同活力,佢話:「喺拍攝過程中,呢種正能量會感染其他演員和製作人員,相信觀眾亦能感受到,朴信惠和希周呢個角色都充滿正能量,因此觀眾會喜歡信惠,亦會喜歡希周。」而朴信惠之前亦曾大讚玄彬,指喺玄彬安排下,演員都會花好多時間互相討論,玄彬話:「我覺得呢個係我責任,以往拍戲時,其他更資深嘅演員都會發揮呢個功能,但覺得今次該由我出面做呢個人,而且呢段過程對我亦有幫助。」
精選韓流,喺晒《娛果》
http://fb.com/appledailyent