日本歌姬宇多田光喺2010年8月時宣佈由2011年開始暫時停止歌手活動，話想試下做個普通人，但佢一唞就唞足五年，而今日日本報章《SPORTS報知》就爆料，指光妹決定於明年正式復出樂壇，今年初為人母嘅佢仲一邊湊仔一邊為新碟進行錄音。

該報章話光妹回歸樂壇已經做好準備，除咗為明年推出嘅新大碟正進行錄音之外，更加同電視台有工作，將會有歌曲作為一啲重頭劇嘅主題曲。好多歌迷聽到呢個消息都好高興，不過，光妹所屬唱片公司就回應事件，話一切未有定案，光妹幾時會重返樂壇依然未有決定，一切只係準備當中，但當追問準備成點時，其公司拒絕再回答，可能要等正式宣佈。

其實呢五年嚟光妹經歷唔少，前年8月其母親跳樓身亡，到去年2月就同一名意大利人酒保結婚，之後長居海外，今年7月仲生咗個B仔，首次為人母。