八方呢幾日都同大家分享過，5年前呢個時空，梁振英捲入咗涉及佢誠信問題嘅華懋官司醜聞，而喺5年前今日，佢終於出嚟公開回應。

CY當時喺出席公開活動後話，「我哋唔能夠話所有喺民事案件裡面作證嘅，包括一啲專業人士，如案件輸咗，呢啲專業人士誠信有問題，法官亦冇咁講」。的確，當年法官喺判詞無直接指斥CY誠信有問題，但判詞係咁講，話CY提交畀法庭嘅信件顯示，佢先後以「諒解（understanding ）」、「協議（agreement）」、最後以「印象（impression）」嚟形容政府同意華懋可以延長物業發展期，而且佢喺接受盤問時嘅解釋模糊不定，無法令人信納（not convincing）。

CY當日仲強調花咗好多時間回應唔同指控，「唔希望自己成為被搞黑材料嘅對象」。放番喺今日嘅時空，早幾日先至因為被篤而唔敢同前港督彭定康同場現身論壇嘅曾鈺成，係咪別有一番感受呢？