【李八方online】大嘥鬼都Work From Hill？拍片提港人行山勿丟口罩垃圾
蘋果日報 2020/02/24 16:29
行山李八方ONLINE大嘥鬼武漢肺炎Work From Hill
武漢肺炎肆虐全港。今時今日出街，戴口罩分分鐘仲緊要過帶手機。八方同唔少港人一樣，雖然明白戴口罩係為咗顧己及人，但總希望可以自由呼吸新鮮空氣，所以近日唔少市民都會趁假日去郊野公園行吓。不過，好多山友覺得山野呢排唔單止多咗人，仲好似多咗垃圾同棄置口罩。
有見及此，環境局吉祥物「大嘥鬼」日前就聯同漁護處吉祥物「B仔」拍咗條片 ，提大家行山時要愛惜自然環境，唔好胡亂棄置口罩同垃圾。喺片中，大嘥鬼就鬧爆隨地棄置口罩除咗無公德心，仲同播毒無乜分別。至於B仔就喺片入面教大家點樣衞生安全咁處理用過嘅口罩。
身為環保界KOL嘅鬼鬼仲不忘抽「行山銀行」水，話要同B仔上山執口罩，影返張相證明自己有「Work From Hill」喎。八方就覺得，代表消防處嘅「任何仁」都應該拍返條片，提大家行山時唔好亂掉煙頭，生火後都記得要撲滅火種後先好離開，陣間又有山火就唔好啦！