剛啱抵港嘅新款Mercedes-BenzCLS350，同先前嘅SLK280開篷跑車一樣，都只屬Facelifted小改型號，變嘅地方除集中喺外觀，例如鬼面罩由舊有四頁式變成雙頁式及換上橢圓形雙出尾喉等。安全設施亦有明顯改良，其中能夠令駕駛者一望而知嘅，就係一組尾燈變成透光度極高嘅LED，喺大雨或晚間等目視範圍較差嘅地方，都可以讓後車嘅駕駛者清晰可見，即使前路有障礙物須要急煞，後方車輛都可以有充裕時間作出反應。對駕駛者而言，最受用嘅肯定係新設計嘅門邊鏡，鏡殼上有新的箭頭形指揮燈，鏡面面積亦增加咗32%，配合車頭一對幾近呈L形嘅Bi-Xenon頭燈，監察車身四周的情況更輕鬆，行車安全程度倍增。

全新CLS350喺安全設備有大改進嘅同時，車廂陳設亦作了修改，前後兩排共可容納四名乘客嘅真皮座椅，續得廠方垂青而獲保。軚盤改用新款跑車化三幅式設計，四周亦加有桃木裝飾襯托，明顯係將豪華同活力兩種形象結合。不過，要彈嘅始終係空間問題，由於CLS被廠方撥入Coupe跑車一類，所以每位乘客可用嘅空間（尤其後座）基本上可以被評為較小嘅級別，生得高大嘅乘客理應感到頂頭。機械配搭係另一個令我對新車着迷嘅地方，因為嗰台3.5V6引擎經廠方調校後馬力增至272匹，我當然要一嘗增大馬力後嘅表現。果真不負眾望，着車嗰剎那，尾喉傳來引擎咆哮聲，若將7G-Tronic半自動波箱改以手動操作，起跑加速反應比舊版敏捷。當然，一套18吋高效能輪胎及跑車化懸掛設定，都令我喺水氹處處嘅路上飛馳或入彎都信心十足。

引擎：3,498c.c.V6DOHC
馬力：272hp/6,000rpm
扭力：350Nm/2,400-5,000rpm
傳動：7G-Tronic半自動波，後輪驅動
尺碼：4,917×1,873×1,430mm
軸距：2,854mm
車重：1,730kg
車輛提供：仁孚行（28957339）