今年香港個車市好旺，除經濟好轉買車意欲高外，最重要係到港新車多到你唔信；就好似瑞典Volvo咁，繼走行政房車路線嘅S80，同講型講享受嘅開篷跑車C70後，呢個周末同周日，又有架全新C30車系喺海運大廈展出。
全新嘅C30針對年輕人市場，外形少有地用上年輕化雙門掀背設計，相比其他Volvo後生得多，車廂空間仍咁大咁舒服。當你將後排椅背放低之後，個尾廂仲大到你唔信㖭！引擎就係一台2.5公升直5Turbo型號，馬力輸出可達220hp/5,000rpm，扭力更達320Nm/1,500-4,800rpm㖭，配埋5前速Geartronic半自動波箱，起步加速反應爽快直接。至於車價，聽聞首批新車賣29萬幾，但數量極之有限，有興趣嘅話就要快手啦！記者：鄭達基