前兩日敏妮同公關D、公關L去happyhour,兩位中環OL,一講到工作就呻到樹葉都落。公關D話:「我公司老闆只係會升啲擦鞋嘅下屬,自己唔係好識擦鞋,淨係識得做嘢,所以就唔使旨意升職。」
至於公關L就相反,差唔多隔年就升職,不過,佢同樣呻,「自問對啲下屬都唔差吖,但開親會對佢哋有啲要求,背後就會聽到,『L,變咗喇,升咗職就成個人唔同晒喇!』」
公關D其實喺公司裏面都已經係一個小頭目,對下屬嘅照顧,敏妮絕對可以用「無微不至」嚟形容,下屬有乜頭暈身㷫、家有喜事,佢都義不容辭叫下屬早啲走,自己頂晒所有工作。
不過,以為公關D咁樣就好得下屬擁戴?錯晒!表面上,下屬的確好歡迎佢,但事實係下屬一啲都唔buy,覺得佢搶晒啲嘢嚟做,博好表現。
另一方面,喺老闆眼中,公關D同樣唔合格,因為掛住幫下屬,搞到自己忙到不得了,老闆見佢咁都唔敢打搞,仲點會升佢職,畀更多更重要嘅任務佢,所以幾年前做咗小組阿頭之後,佢就一直冇更上一層樓。