阿里巴巴（1688）噚日舉行股東周年大會，主席馬雲再有豪情壯語，佢話10年後中國將會出現Supernumberone嘅電子商貿公司，而阿里巴巴係最有機會登上呢個寶座嘅公司。而佢最近喺3月走訪咗美國多家大型企業後，就預言部份美國大企業將於21世紀消失，或者生不如死！

預言部份美巨企會消失

噚日嘅股東會別開生面，先有樂隊演奏，之後馬雲演講，做到係中小企經商分享經驗嘅平台，就好似股神畢菲特喺巴郡股東會分享投資心得一樣。
馬雲講番早前去美國，先後到訪過eBay、雅虎、Google、微軟、Apple、星巴克等多家大型企業，發現唔少美國企業已經失去10年前科網熱嗰種熱情、夢想，連IT公司嘅工程師都只係諗住產品點樣賺錢，而唔係着眼於產品可以點樣幫人。
至於中國，佢預期未來5年，中國經濟增長會非常快，「中國政府執行力度天下無敵！」而中國電子商貿市場將會超越美國，因此10年後全球最大嘅電子商貿企業亦會來自中國。馬雲話，阿里巴巴如果將來唔能夠成為偉大嘅公司，規模拍住微軟、通用電氣、沃爾瑪等巨企，佢會死唔眼閉！

馬雲：要同微軟睇齊

佢又預告，今年9月阿里巴巴10周年嗰陣，佢會宣佈未來10年發展策略，利用互聯網建立商業文明，減少買假貨及中介商抽水環節。
公司噚日邀請80位來自港大同中大嘅學生出席股東會，仲每人獲贈100股阿里巴巴股份，由大股東阿里巴巴集團捐出。馬雲話，希望學生長線揸住股票，每年參加公司股東會，同阿里巴巴一樣堅守使命同價值觀咁話。

李華華
mailto:[email protected]