意大利70歲名帥納比，上個月帶領中國隊喺亞洲盃8強以0:3不敵伊朗出局後，正式離任國足主帥一職。事隔一個月，納比接受《米蘭體育報》訪問時仲係火遮眼，直斥國足班球員全無責任感同榮譽感，仲鬧鄭智為首嗰批老將「揀波踢」。

喺中伊大戰之前，納比不斷同國足球員強調要「杜絕失誤」，結果中國球員喺呢場波「自殺」3次吞足3蛋，納比把火嬲到𠵱家仲未撲熄：「我真係好嬲，對伊朗本想為球迷踢一場好波，賽前我哋準備咗好多，球隊亦成熟咗唔少。但我意識到國足班球員嘅問題，佢哋唔重視友賽，只會發揮自己20%至30%嘅實力；當喺世盃外等重要比賽時，佢哋先會發揮超過100%。我帶領中國隊喺大賽只輸過三場，一次對南韓、兩次對伊朗，今次輸波我喺更衣室非常之嬲，開賽時球隊其實踢得唔差，但因為3次致命失誤失咗3球，至今仲好難解釋原因，但佢哋一啲責任感同榮譽感都冇。」

年輕一代未夠班

當被問到點解會以一支亞洲盃決賽周中年紀最大嘅球隊出戰時，納比解釋係新一代「唔夠班」：「喺2018年世盃外出局後，部份年紀較大嘅球員，連最後一次踢世盃嘅希望都冇埋，心理上已有啲放棄國家隊，所以我決定推行年輕化。但經過一啲比賽後，我意識到中國班年輕球員根本未準備好喺高水平比賽出戰，所以只好重召老將。」

對於自己嘅未來，納比傾向執教一支距離家鄉不太遠嘅國家隊，但就唔想再接手球會。