邊個話雷霆得韋斯卜克（Russell Westbrook）識攞分？邊個話韋少獨食唔識交波？周五NBA常規賽，雷霆嘅主角仍然係交出「三雙」32分、13籃板、11助攻嘅韋斯卜克，但隊友呢場打得相當有火，得分點盛開下以115:113擊敗火箭，場數追近至1:2！

韋少喺Game 2賽後曾經嬲到爆粗：「我哋輸咗，我唔在乎嗰啲該死嘅數據。」結果喺周五賽前俾聯盟罰款15,000美元（約11.7萬港元），好彩球隊能夠化悲憤為力量，一開波喺韋少0出手下打出一段11:2攻勢，韋少亦樂於製造機會，包括造就T吉遜（Taj Gibson）入樽振奮士氣，火箭就靠賴恩安達臣（Ryan Anderson）打破季後賽3分入球荒還以顏色，首節落後25:34。第二節夏登為火箭力追，半場已經攞咗20分，「第六人」L威廉士（Lou Williams）亦交到貨，但雷霆繼續得分點盛開，半場力保65:58優勢。

火箭第3節又嚟下馬威，以9:0攻勢反超前67:65，但雷霆站穩陣腳後再度拋離，其中後備上陣嘅D麥達莫（Doug McDermott）同西班牙小將艾賓尼斯（Alex Abrines）尾段連入兩球3分，為雷霆領先93:83進入最後一節。火箭喺第4節一輪衝分下追至103:106，掀起球賽高潮，尾段雙方王牌都先後造出失誤，韋少一傳一射都失諸交臂，夏登亦俾T吉遜嚴防下24秒違例，直至完場前35秒，韋少3分唔入下靠阿當斯（Steven Adams）補籃成功領先113:111，佢之後又兩度射失關鍵罰球，造就火箭有最後一擊機會，但攞完籃板由夏登後場帶上前場起手3分未能命中，結果「大鬍子」貢獻44分、6籃板、6助攻都於事無補，俾雷霆險勝115:113，其中T吉遜交出20分、A羅伯臣（Andre Roberson）同奧拉迪普（Victor Oladipo）亦各有12分進賬，Game 4下周一香港時間凌晨3點半繼續喺雷霆主場上演。