每逢有韓星生日，韓國粉絲又好，各地粉絲都好，都會整場「大龍鳳」嚟賀偶像，有粉絲會以偶像個名起樹林，亦有粉絲試過拎住個牌跳傘向偶像示愛，真係咩招式都有。

而由男團帝國之子出身、早前憑劇集《未生》而大受亞洲粉絲歡迎嘅任時完喺下個月1日就會迎來佢27歲生日，一直受盡粉絲送禮祝福嘅佢，喺今年生日當日早上，時完就決定帶埋粉絲一齊進行送煤活動嚟慶祝，希望為有需要嘅人送上愛。

佢仲喺twitter留言叫粉絲多多支持：「雖然有少少尷尬，但希望講下有關我生日嘅事，每年雖然唔係咩特別日子，但好感謝得到大家嘅祝福，喺每年只有接收嘅生日入面，今次希望可以以給予者嘅身分同大家一齊進行送煤活動，唔好猶豫積極參加。」