遠東發展上月以四億七，出售遠東銀行旺角大廈舖位及一個住宅，畀投資者黎永滔，噚日突然公布交易要延期完成，當中涉及由遠展做物業出租代理人一事，重有待決定。

誰任出租代理
遠展方面解釋，當初嘅買賣協議，有一項條款，係業主向買家保證，首兩年每年約五厘租金回報，即買方每月可收百九萬租。
遠展強調，交易冇大問題，只係律師樓對大額成交處理嚴謹，成交期至由八月延至明年三月。

五厘回報保證
蘭西記得，物業成交時實際回報約三厘八，計番月租得百五萬，遠展玩「租金保證」，兩年代價約九百六十萬，如果一次過回贈畀買家，等於樓價兩巴仙。

明日之星睇樓
知名人士與普通人一樣，得閒去睇吓樓。今屆落選港姐沈穎婷，剛剛參選完，雖然攞唔到冠軍，但視為大有條件打入娛樂圈。消息人士話，佢噚日偕母親李影與一男性朋友，去睇悅濤軒示範單位，一行三人喺中環售樓處研究咗一陣，好似有興趣買兩間。
長實上個禮拜五開始賣悅濤軒，今個禮拜想集中做花園平台單位，噚日公布呢種單位名為「綠悠雅軒」，全數三十二個，六百九至千二呎，平台花園百七至三百五呎，禮拜六先推四個，以登記洽購方式賣，意向呎價三千二。