古天樂、林家棟、雪兒同黃柏高等，噚晚喺灣仔出席《殺破狼‧貪狼》慶功宴。《殺》片大陸票房過5億，香港約800萬，有咁好成績，噚晚除咗筵開10席，現場仲有老闆預備咗50萬現金抽獎。

古仔即將飛大陸拍古裝電影，提到《殺》片票房成績好，古仔自言十分滿意，問到被睇好攞影帝？古仔話：「希望係啦！好開心拍到部咁好嘅戲，攞獎要睇命運安排。」問到宣萱會同古仔經理人Ronnie合作，古仔就話一切都要問番經理人，但佢就話好想同呢位舊拍檔合作，仲話有留意佢拍嘅電視劇。

講到宣萱逆齡生長( 新聞連結： http://bit.ly/2y4Phtq )，古仔即刻話：「最犀利佢個樣真係冇變，演技就不斷進步，逆生長真係好難做到，佢反地心吸力。」有冇同宣萱交流逆齡心得？古仔話：「有傾偈，知道佢食飯keep得吓，有足夠睡眠同運動，好睡眠我做唔到，因為工作，係好難令睡眠質素好，我每瞓兩個鐘就醒一次。」問佢係咪壓力太大？古仔話睇過醫生，佢話：「話我血液循環問題，不過我瞓覺會發夢發返日頭做嘢嘅情況。o依家已經習慣咗，我覺得OK嘅，放假會好啲。」

家棟最近仲拍緊鄭保瑞導演同李安兒子李淳合作嘅《智齒》(暫名)，拍得好辛苦，佢話：「噚(前)日拍場摷垃圾戲，整損隻手，喺土瓜灣真係對住個屎渠，第一次對住鄭保瑞咁長時間，佢出名癲又歇斯底里同傻，所以成日通頂。」家棟話導演要去北京3星期，佢都可以休息吓，但返嚟就繼續拍，家棟話：「真係沒完沒了，每日現場修改劇本。今次同《殺破狼》好唔同，跑咗我成世嘅quota，跑到扯哮，依家瘦咗6磅，瘦多3磅好嘞。」

另外，雪兒就話電影成績好令佢好興奮，日後都可以繼續接受挑戰，多啲嚐試唔同角色，問佢接唔接受性感？佢話：「我本身唔性感，性感唔到。」而新晉演員陳漢娜就話拍完呢部電影後有好多工作機會，嚟緊會拍一部新導演嘅戲，仲接咗ViuTV嘅劇集擔正主角。