ViuTV真人騷節目《全民造星II》明晚舉行總決賽，今日率先為節目進行拜神儀式，十強參賽者Phoebus（14號吳啟洋）、Oscar Li（20號李祉均）、Mike（24號曾比特）、MC（28號張天賦）、Tank（29號梁德忠）、JJ（38號范卓言）、Brian（69號阮頌揚）、George（74號歐鎮灝）、Hugo（82號丘凱雄）、Justin（95號陳樂）全以黑衣造型示人，Mirror四位師兄Lokman、Ian、Anson Kong及姜濤亦有到場，為眾參賽者打氣。

被視為大熱的MC表示，已為總決賽的演出準備得七七八八：「好緊張，睇番其他參賽者好似多道具過我。」問他是否坐定粒六？MC即否認，又透露明晚的演出有別以往：「以往大家會覺得我嘅演出抒情啲，今次會狂野啲，希望花姐會覺得我有突破。」

同樣有望勝出的Tank，對自己有一定信心：「我都準備好晒，希望到時唔好怯場。跳舞一定有，唱歌都有少少，我有秘密練功，希望到時唔好咁魔音。」對於被指是大熱，Tank未有刻意理會別人的評價：「因為上台嘅始終係我，聽完，我都係『thank you thank you』。」MC認為呼聲越高壓力越大，擔心演出與外界期望有落差，怕辜負支持者。

黑馬Phoebus及Hugo對自己的演出有信心，Phoebus明晚將是首位出場的參賽者，他說：「香港好少人做呢類表演，希望大家可以感受到，我會炒熱個場。」Hugo聞言即抵死說：「我哋有暖場嘉賓啦。其實我都好期待自己嘅表演，大家都知，而家《造星II》得番我一個『女參賽者』，希望畀大家睇到唔同面向嘅我。」

Hugo給自己5分，認為結果很難控制：「可能啲沉默嘅大多數終於出嚟投票又唔定，到時就可以逆轉勝。」他感謝媽媽為他充當流動宣傳車：「我阿媽去到邊都同人講，個仔參加咗比賽，我會請佢食飯報答佢。不過要瞓醒先，因為做完呢個節目，我應該要瞓一年先得，出年見啦大家。」

Phoebus表示有拍宣傳片拉票，亦有向家人及親友搵票，會給自己7分。記者笑問有否發蛇齋餅糭搶票？Phoebus即自爆有中學老師支持：「多謝老師，佢話會叫我啲師弟妹投票，所以之前都返咗學校拉票。」

採訪：盧妹
攝影：葉君海

-----------------------------
《2019高級珠寶鑑賞誌》
點擊即睇過百款鑽飾名錶
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇