美國上月新屋銷售創2008年金融海嘯以來新高，市場忽然唔再擔心加息，隔晚美股轉炒經濟向好，道指急升213點或1.2%，帶動亞太股市昨日上揚。港股反彈537點或2.7%，收報20368，一舉收復10日、20日、100日線，升市成交配合，錄得620億元，較過去兩日大增四成。
下周一期指結算，本周為轉倉周，大戶挾完好倉轉挾淡倉。睇摩通數據，昨日屠熊後，下一重倉區係20450至20499，短線或會再衝上屠熊。
不過，美國加息高唱入雲，利率期貨顯示，聯儲局6月、7月加息機會升至近六成，美滙指數升至95.5近兩個月高位，人民幣中間價創五年新低，隨時拖港股後腿。

港股通吸資逾200億

據外電講，中國試圖透過官方途徑確認美國聯儲局係6月加息定7月，以便做好應對，官方途徑包括6月初舉行嘅「第八輪中美戰略與經濟對話」。
前日《華爾街日報》話收到風，人行已於1月4日嘅閉門會議剎停人民幣滙率市場化機制，皆因國家主席習近平眼見滙改後，人民幣貶值令資本外流，連中國人自己都千方百計轉走資金，令佢好震驚。
大媽為避貶值風險，傾向買入與美元掛鈎嘅港元計價資產，可由滬港通數據窺見一斑。港股通連續21個交易日錄得淨流入，合共吸資超過200億港元，以周一、周二港股通買盤成交都有15億港元，昨日更有21億港元計，三日都佔大市成交3.4%，大媽儼然成為魚缸重要水源。

值得注意嘅係周一港股通持倉總額為1,485億港元，滬股通持倉總額為1,246億元人民幣，以當日人民幣兌港元報1.1884計，折合1,480億港元，較港股通持倉總額少5億港元，為滬港通2014年11月17日開通以來，港股通持倉量首次超越滬股通！
港元與美元掛鈎令港元升值，加上中港矛盾，旅遊業景氣轉差，做遊客生意嘅行業都嗌晒救命。相關股票如旅行社、酒店、商舖收租、零售、飲食等，只有連鎖快餐集團較硬淨，可候低吸納。
快餐股中，大快活（052）、大家樂（341）、翠華（1314）都係3月底年結嘅公司，就快放榜。睇返中期業績，大快活多賺35.4%、大家樂少賺14.7%、翠華少賺8.5%；往績市盈率分別係23倍、21倍、13倍；往績股息率分別係3.5厘、3.6厘、5.5厘。
我嘅心水係大快活，股價上月一度創超過22年新高，報28.1元，最近反覆回吐至上周25.2元，本周於26元至26.5元橫行，不妨吼位炒番轉業績。

割柑人
本欄逢周四刊出