昨天寫到中港兩地居民在跨境消費過程中，不可避免地糾結在一起，此消彼長，亦造就了社會內外的矛盾。其中「貢獻」和「影響」最大的，始作俑者也就是曾特首當日眉飛色舞地提到「中央送禮」政策的其一，並大言香港想窮都幾難嘅自由行。參照旅發局及相關資料，去年內地旅客到訪人數達2800萬人，當中逾六成為自由行旅客，相對政策推出初期的人數大幅增加26倍，而上半年至今入境嘅陸客，比對去年同期還是有兩成幾增長。而市場估計，由內地客推動的本港經濟增長，主要見諸於零售業，年度數字佔整體經濟續由0.4%升至0.9%，即係都仲未到百分之一！況且淨係計產出，政府又有冇認真同市民計過中間所涉的公共成本係幾多？

效益大跌　配套卻難兼容

就以最受惠嘅零售業為例，行業興旺係帶動舖租上升嘅重要原因，今日店舖東主或會因為生意好啲而賺多啲，不過支歌仔只會唱到續約嗰陣，因為租金已經升到無譜，繼續撐落去，縱有提價空間，卻總追不上加租幅度，到時咪又變番艱苦經營。而經濟利益最終亦只會回歸業主和地產商，其實最受惠嘅又係邊個？過往這些情況或只會發生在商業旺區，看似不會直接影響區外居民，不過當上水呢個咁傳統嘅非商業地區都受到波及，居民要同啲水貨客爭購爭車爭路之餘，仲要捱貴貨，你話最受罪嘅又係邊個？又參照旅發局公開數字，去年訪港內地客中，有800萬人次為深圳的「一簽多行」且即日回來的旅客，這批都是三年前內地政府批准200多萬享有無限次「進出」香港的持深圳戶籍人士。毋須考證，當中絕大大大部份咪就係嗰啲水貨客。講真呢啲民生問題，既非小事，更唔係乜嘢地下活動，全部都係光天化日明目張膽咁發生，根本唔使擔凳仔同攞筆記本都可以了然於心，政府不針對情勢處理，依法執勤，反而跑去為非深圳戶籍人士（呢批更多至400幾萬）可「一簽多行」來港吶喊助威，又怎會不是本末倒置。現時雖喊停此項德政，但係同樣「擱置」並非「撤回」，有朝本土經濟轉弱，政府定乘虛而入，趁勢推出以小蠅利換大苟合。若然順利「過骨」，往後香港真係想唔「紅」都幾難。別怪我疑人多慮，眼見往後新增自由行消費力顯然較低，確實已不能為香港帶來多大經濟效益，惟社會各樣配套能否兼容，現政府卻不關心，這樣又怎教人安心。盧先亞