公民黨法律界議員吳靄儀去向，係近日政圈最大懸念，八方收到風，左右吳靄儀決定嘅關鍵，唔係公民黨而係民主黨。據了解民主黨元老級人物，日前向吳靄儀方面發出訊息，叫佢唔使擔心法律界席位落入建制派手中，因為民主黨都有王牌喺手，就係大律師沈士文。知情人士同八方講，唔係公民黨先有大狀，今次好在仲有民主黨！
據民主黨人講，既然佢哋有人，吳靄儀大可放心退下來，除非公民黨唔捨得法律界個位，或者有人唔係真心想交棒啦。公民黨9月選舉形勢不妙，張超雄轉戰新界西冇運行，譚香文又危危乎，如果吳靄儀唔選，就剩低幾個直選大狀支撐大局，所以公民黨咁肉緊吳靄儀去留，若然呢個位拱手讓予民主黨，公民黨打回原型變番「四十五條關注組」，如何領導泛民？
如果吳靄儀諗通咗，決定競選連任又點呢？有人作出一個極端大膽假設，指沈士文大把出路，去港島直選都好有機會。八方唔敢揣測沈士文去向，不過忽然明白點解近日捲起排山倒海「倒單仲偕」浪潮。有人要捧新人上位，當然有責任幫佢清場先啦。一個港島區民主黨成員同八方講，如果單仲偕執迷不悟，佢哋絕不手軟追打「投機分子」。
講番沈士文，佢喺港同盟年代已入黨，曾任黨內紀律委員會成員，形象正派，06年代表民主黨，就唔公開黨員名冊提出司法覆核。沈士文係德高望重嘅資深大律師張健利徒弟，又深得民主之父馬丁器重，馬丁乖仔李祖詒入行做大律師，師傅就係沈士文。沈士文同天主教香港教區關係密切，年前爆出神職人員孌童醜聞，佢獲主教陳日君樞機臨危受命幫教區收拾殘局，協助制訂指引防止同類事件再發生。

沈士文亦同民間組織有交情，佢係天主教正義和平委員會法律顧問，不時代表長毛、陶君行等示威常客打官司，舊年以「友情價」幫《中大學生報》情色版提出司法覆核挑戰淫審處，民主派人士指唔好輕視呢啲關係，如果沈士文真係從政，獲民間組織支持係一大優勢，要動員人手助選都易啲。據講沈士文未夠50歲，正值盛年，有人形容佢可能係民主黨隔代主席接班人。

mailto:[email protected]