「河蟹局長」曾德成噚日喺官方網站發表題為《香港容得下佛門淨土嗎？》嘅文章，好感性咁話，日前去大嶼山鹿湖探訪多個寺院，見到山澗被建築工程截流，大樹被砍伐，天然資源「已受到土地開發商的威脅」；又打聽到有地產公司誘使出家人出讓業權，話咁樣做係「不利於社會和諧」。

民政局一直冇做嘢

德成局長全篇文遮遮掩掩，冇講到係乜嘢工程，又冇話政府要跟進。各界關注骨灰龕法案大聯盟發言人謝世傑話，曾德成講緊係鹿湖延慶寺嘅改建骨灰龕工程，早喺兩年前開始嗰度嘅環境已經受到破壞，寺院俾人放骨頭，又受到「午夜凶鈴」騷擾。早前地政總署回覆大聯盟，指該寺違反地契，唔可以建骨灰龕，現已徵詢法律意見採取行動。
謝世傑話，民政局對骨灰龕問題向來抱住「多一事不如少一事」嘅態度，今次曾局長篇大論亦完全冇回應到問題。公民黨陳淑莊就話曾局長根本後知後覺，「係人都知延慶寺搞骨灰龕，不如講白啲」。佢話民政局一直冇做過嘢，村民同寺院對政府失晒信心，「淨係感性冇用，不如實際去回復番（鹿湖）原貌啦」。局方回應話，相關部門正跟進事件。