新劇《毒梟：墨西哥》（Narcos：Mexico）播映以來評價不俗，早前電影《蟻俠》（Ant-man）男星Michael Pena，偕同墨西哥男星戴高路拿（Diego Luna）及製作人Eric Newman專程到訪新加坡宣傳新劇。除咗出席記者會，Michael及Eric另外亦接受本報獨家專訪。

故事入面講到緝毒探員Kiki為捉拿毒梟歸案，全家專程搬到墨西哥嘅危險地帶。而飾演Kiki嘅Michael現實中亦有老婆同囝囝，但佢就表示自己因為太錫囝囝，唔願意冒險：「Kiki同我好唔同，我想俾晒一切我個仔，同時希望唔會寵壞佢。而Kiki就有任務在身，佢好想打擊罪惡。我會唔會好似佢咁做？我唔知，老實講真係好難好難揀。」不過佢補充：「我同我老婆囝囝已經住喺洛杉磯啦！」笑指洛杉磯都係個危險嘅地方。

今次《毒梟：墨西哥》係系列中嘅第二輯，全因上一輯《毒梟》（Narcos）非常成功，Michael坦言自己都係粉絲：「我係超級粉絲，實在好難唔愛上部劇集，佢有一流嘅故事，但同時好難想像係真人真事。你想像唔到有人會為賺一蚊而去到幾盡，好難以置信。佢哋好多人為生活上嘅少少奢華，最後失去一切，真係一場好大嘅賭博。」

製作人Eric Newman係兩輯劇集嘅創作人，面對上一輯咁成功，佢都表示有壓力：「我應該唔可以勁到無壓力。每個今次參與嘅編劇、導演、演員都好鍾意上一輯，所以個要求已定得好高。我希望做到嘅係，當我哋睇套劇，會笑住話係我哋想做到嘅效果，而我哋都期待可以令自己滿意。」Eric又表示好鍾意而家兩位主角，之前曾經於4年間易角3次，係一個好大嘅挑戰，但而家就非常滿意。早前Eric曾於新加坡宣傳時表示自己好鍾意香港：「我未嚟過香港，只係轉機來新加坡時於上空飛過。」有記者問到佢會唔會想拍部香港版毒梟？佢笑指：「當然，絕對，唔該幫我報名！我計劃劇集時諗過用好多地方去拍《毒梟》，但香港好似無咁嚴重嘅販毒走私問題，但我睇好多香港黑幫片！」而Michael亦表示想一齊嚟香港。

Google Play 2018 年度最受歡迎應用程式，請即點擊 http://bit.ly/2FCthz5 投《蘋果動新聞》一票

精選娛聞，喺晒《娛果》
http://fb.com/appledailyent