朱玲玲早上離開養和醫院後，霍震霆同母親呂燕妮、兒子霍啟山約下午一點半到醫院探郭晶晶。

記者問今日係咪出院？霍震霆話：「係呀！」見佢哋著得西裝筆挺，係咪影全家幅?佢話：「佢哋休息中，比佢哋休息下先，佢哋休息幾日，今日嚟探佢哋。」但唔會一家人見傳媒。

霍震霆指太嫲見曾孫好開心，被問改名進展，佢話：「好快架喇！」而英文名呢?，佢話：「冇喇！應該協商一下，如果決定咗會話俾大家知。」

下午2點半左右，啟山先走，佢表示已經準備好禮物送俾BB，問幾時到佢?佢就話順其自然，依家屋企有BB都要習慣下，又話早幾日好攰，呢幾日抖完先好返啲。

至於老爺霍震霆，就大約3點左右離開，佢話有幫孫仔影相，佢仲眼仔碌碌，問啟剛湊BB係咪仲係唔熟手?佢就話時間尚早，咁會唔會叫晶晶生多幾個?霍震霆話要有程序，咁三年抱兩好唔好?霍震霆就哈哈大笑。問晶晶幾時出院，佢就話要等晶晶抖下先。