當年今日
關於我們

李八方online︱民主黨下月換屆 羅健熙料成最年輕主席

蘋果日報 2020/11/06 10:46

民主黨羅健熙梁翊婷

民主黨即將喺下月初舉行換屆選舉,據聞現任主席胡志偉同埋副主席尹兆堅將會退下火線,兩人嘅位置就改由南區區議會主席、現任民主黨副主席羅健熙,與及觀塘區議員梁翊婷頂上。民主黨過去歷任主席當選時都超過40歲,若然36歲嘅羅健熙成功當選,將會係咁多屆以來最年輕嘅主席。
有民主黨中人透露,羅健熙近日正積極組班,除咗搵梁翊婷做副主席,亦都有邀請現任葵青區議會主席單仲偕續任司庫,另外都有好多年輕新生代議員喺中委名單之內。羅健熙同八方講,暫時都未可以透露太多,希望兩星期後再有消息同大家公佈,不過佢都承認有意喺黨政方面繼續服務。
唔會再連任副主席嘅尹兆堅就話,而家做立法會議員今時唔同往日,唔單止議會職務繁重,加上各人都有可能面對唔同刑事後果,為咗令到個黨可以持續運作,佢都支持新生代掌舵,亦可以趁機培養人才。佢又話,羅健熙已經做咗6年副主席,相對熟悉黨務,若然佢有意參選主席亦都會考慮支持。
另一方面,民主黨都會喺今次推動黨內革新,30名中委會成員會減到25個,釋放人手處理其他事務,例如籌款委員會、國際事務委員會同埋選舉事務委員會等等,而現任嘅立法會議員都唔會參與太多中委嘅工作,等新人有更多嘅發揮。
-----------------------------
《蘋果》英文版免費試睇:了解更多
英文版已登錄《蘋果》App,立即下載/ 更新iOS / Android
-----------------------------
支持蘋果深度報道,深入社區,踢爆權貴,即Like蘋果專題及調查組FB專頁