衰歐國盃要喺奧運補償
球驗客手記:意國召3大國腳挺軍

蘋果日報 2004/07/09 00:00


意大利奧運足球隊初步成形,三個超齡球員名額,分別落喺三位有份踢歐洲國家盃嘅球員身上,就係門將保方、後衞費拉利及前鋒卡斯辛奴。
我求大俠一見呢個名單,即刻浮現出意大利奧運足球隊奪得金牌場面;原因佢哋二十一歲以下國家隊,剛剛至贏得二十一歲以下歐洲國家盃冠軍,實力已有番咁上下,𠵱家再加埋呢幾件一隊猛將,邊夠你玩呀?
原本佢哋重黐線,諗住唔要卡斯辛奴要托迪㖭,但最後決定留番托迪嚟打九月嘅世界盃外圍賽。不過𠵱家佢哋都好強,唔通喺歐洲國家盃失意,就想喺奧運攞番啲補償?

愛華頓打人情牌為留朗尼軟硬兼施
愛華頓為咗留住新星朗尼,軟硬兼施,除咗出動一份周薪五萬鎊嘅五年合約,重打埋人情牌。佢哋領隊莫耶斯話朗尼有今日,全靠佢哋肯畀機會;如果朗尼想報答佢哋,留隊就得。但我求大俠認為,如果朗尼有心走,愛華頓做乜都冇用,不如諗吓點利用賣朗尼換返幾千萬鎊好過。

新帥瞓覺諗住紅軍賓尼迪斯老婆爆料
利物浦新領隊賓尼迪斯個老婆蒙絲日前就話,賓尼迪斯好高興可做紅軍領隊,所以連瞓覺嗰陣時都猛咁講紅軍嘅嘢,例如係排乜嘢陣同買乜嘢人咁,搞到佢冇覺好瞓。賓尼迪斯咁重視呢份工,對紅軍球迷係喜訊,希望佢可搞好紅軍,嚟緊同曼聯、阿仙奴同車路士爭一日之長短。
巴基願留隊助升班列斯球員鳥獸散
列斯喺降落英甲後鳥獸散,羅賓遜、阿倫史密夫、麥法尼、米拿、維杜卡、馬迪奧、韋確斯同班比都離隊,但巴基話想留隊幫隊波打返上英超。我求大俠好欣賞巴基咁有心,不過以列斯𠵱家嘅實力,等同天方夜譚。列斯負債纍纍,巴基人工唔平,如果佢想幫手,不如走好過。

迪西里落班真識揀向些路迪送秋波
蘇超聯些路迪話畀車路士放棄嘅三十五歲法國後衞迪西里送秋波。迪西里都幾識揀,一來蘇超聯水準較低,啱佢呢啲走下坡嘅球員踢;二來些路迪係蘇格蘭冠軍,即係佢重有機會踢歐冠盃。但話時話,格拉斯哥天氣凍,生活又冇倫敦咁多姿多彩,我求大俠真係擔心佢頂唔住。