當年今日
關於我們

【星夢】「你不寂寞!」張文采公開安撫羅鈞滿

蘋果日報 2013/10/13 06:00

羅鈞滿星夢傳奇張文采寂寞的男人木紋

噚晚《星夢傳奇》直播誕生四強,網民一邊睇一邊話造馬,話安排高分王鄭俊弘做壓軸,而且全場起晒身扭籮聽佢唱歌不突止,仲俾97分佢,巫啟賢仲好煽情咁大嗌咗一句:「你好嘢!」有網民就話,既然俾到佢97分,近乎滿分,又使乜今晚再比賽?索性噚晚就俾個冠軍佢啦。

亦有網民質疑,點解羅鈞滿噚晚可以失準成咁。雖然大家都聽得出,亦睇得出佢真係好攰,係咁唱錯歌詞,仲走音……但冇理由捱到最後一刻會突然水準跌到咁0架。更有網民話,羅鈞滿輸咗之後,即俾機會佢solo唱番歌《寂寞的男人》——係咪一早夾定0架?

今日凌晨3點52分,羅鈞滿喺微博寫道:「或許,我輸了比賽,但贏了友誼。感謝在現場在電視機旁為我心跳的每一位!路一直都在,我會繼續走下去。」sotouching。佢要感謝嘅,除咗家人及fans外,仲有噚晚好想嚟支持佢嘅女友張文采。

張文采見男友輸咗,不避嫌亦唔理無綫要佢低調,早於凌晨十二點,已於微博留言,回應男友唱一曲《寂寞的男人》:「仍然能擁有夢想跟前途,仍然能擁有自尊跟自豪!你唱出寂寞,但你不會寂寞!」網民紛紛留言:「結婚結婚!有你撐住佢,無嘢難到佢!」、「有你嘅支持已經贏了全世界。」、「他有你,還能怕什麽?」仲有人問張文采噚晚有冇去現場撐男友。

雖然女神已心有所屬,而且愛得好深…令人好酸…不過睇完女神咁撐男友,都感動到眼濕濕。但都有人留言話:「由第一集唱到最尾一集的靚仔羅鈞滿輸在揀錯歌,佢應該揀唱學友嘅歌,最尾首歌《寂寞的男人》唱得好好呀!!!!!!!」係囉,唱學友咪好囉,點解要唱《木紋》呢?