上星期分別有升中派位放榜同中學文憑試放榜，勞工及福利局局長羅致光（CK）都有透過電郵向母校英皇書院嘅應屆考生送上鼓勵。CK喺最新網誌話，喺電視訪問片段中見到同學仔表示唔捨得老友記各奔前程，令佢勾起一絲想當年嘅感觸。

CK 1966年畢業於堅尼地城呂明才紀念小學，佢憶述，當年同班同學中不足三分一人屋企有電話，唔似得而家隨時可以用Whatsapp溝通交流，因此升中無幾耐，大家就失去咗聯絡。原來CK早幾個月曾經試圖聯絡呢班半世紀前嘅舊同學，但發現全班50人中，只有15人當年地址簿上嘅樓宇仍然存在。透過舊地址、電子網絡同社交網絡，最終只係搵得番8個同學仔。所以佢特別奉勸升中嘅同學，要珍惜童年時代嘅友誼，否則失去咗就真係好難搵得番。

不經不覺，新班子上任已經超過兩星期，CK估計，下一輪傳媒感興趣嘅「放榜」，相信係副局長同政治助理嘅人選，佢話希望可以早日「齊腳」，分擔佢工作咁話。